ດັງຂ້າມຄືນ ເຈົ້າຂອງ ໂພສ ຄຳຂໍໂທດຈາກແຟນເກົ່າ
ຈາກກໍລະນີທີ່ມີ ຜູ້ໃຊ້ ເຟສບຸກ ຊື່
Somsavine Vssp ໂພສຫົວຂໍ້ວ່າ "ຄຳຂໍໂທດຈາກແຟນເກົ່າ" ພ້ອມກັບເນື້ອໃນໃຈຄວາມທີ່ຂຽນໄວ້ຄ່ອນຂ້າງລະອຽດ ເຮັດໃຫ້ຫຼາຍຄົນທີ່ເຂົ້າໄປອ່ານຮູ້ສຶກມີແຮງບັນ ດານໃຈໃຫ້ກັບຕົນເອງພ້ອມທັງສະແດງຄວາມເຫັນອົກເຫັນໃຈ ແລະ ໃຫ້ກຳລັງໃຈໜຸ່ມຄົນນີ້ເປັນຈຳ ນວນຫຼາຍ ຈົນປັດຈຸບັນມີການ ກົດຖືກໃຈ ແລະ ສົ່ງຕໍ່ຂໍ້ມູນກັນຫຼາຍພັນຄັ້ງ ເຊິ່ງ ໂພສດັ່ງກ່າວ ໄດ້ຖືກ ໂພສ ໄວ້ ຕັ້ງແຕ່ວັນທີ 6 ສິງຫາທີ່ຜ່ານມາ ເນື້ອໃນຂຽນໄວ້ວ່າ:
"ຄຳຂໍໂທດຈາກແຟນເກົ່າ"
......................................................................................................
ທ້າຍອາທິດຜ່ານມາ ກໍ່ຖຶກກັບໄລຍະຝົນຕົກໜັກເນື່ອງຈາກພະຍຸຊົງກາເຂົ້າມາຢາມອີກຄັ້ງ, ສົ່ງຜົນໃຫ້ຄົນທັງຫຼາຍນອນຢ່າງເຕັມອີ່ມໃນວັນພັກຜ່ອນເສົາ-ອາທິດ. ສຳລັບຂ້ອຍເອງກໍ່ເຊັ່ນກັນກັບຫຼາຍຄົນທີ່ນອນແຊບຈົນບໍ່ຢາກຕື່ນເພາະອາກາດເປັນໃຈໝົດມື້ເລີຍ...
ບັງເອີນໄດ້ຍິນສຽງໂທລະສັບດັງຂຶ້ນ ກໍ່ຈັບຂຶ້ນມາເບິ່ງເປັນເບີຕັ້ງໂຕະ 030 ທີ່ບໍ່ຄຸ້ນປານໃດ? ເມື່ອຮັບສາຍປາກົດວ່າເປັນສຳນຽງຂອງຜູ້ຍິງຄົນໜຶ່ງໂທມາທັກທາຍສະບາຍດີ ຖາມເຖິງຄວາມທຸກ-ສຸກຕ່າງໆ ລວມທັງຊີວິດການເປັນຢູ່ໃນປັດຈຸບັນ ເມື່ອລົມໄປໆມາໆກວ່າຈະຮູ້ໄດ້ວ່າແມ່ນໃຜ? ກໍ່ເກືອບຕັ້ງ 20 ນາທີ; (ເພາະວ່າສະໝອງຍັງຈູນຄື້ນຄວາມຖີ່ຢູ່ວ່າແມ່ນສຳນຽງໃຜ?).
ຫຼັງຈາກລົມກັນໄປລົມກັນມາ ກໍ່ໄດ້ຂໍ້ສະຫຼຸບຮູ້ວ່າເປັນເບີ “ແຟນເກົ່າ” ທີ່ເຄີຍຖິ້ມເຮົາໄປມີແຟນ ໃໝ່ ຕັ້ງແຕ່ສະໃໝຮຽນປີ1 ໃນສາຍວິຊາຊີບເມື່ອປີ 2009 ຫຼື ຕັ້ງແຕ່ສະໃໝຂີ່ລົດຈັກຮ້າງ ຍີ້ຫໍ້ ຮອນດ້າ 50 (ສີຂາວ-ແດງ). ແຟນເກົ່າຄົນນີ້ ຖາມວ່າເຮົາແຕ່ງງານແລ້ວບໍ? ຂ້ອຍຕອບວ່າຍັງ? ລາວຖາມຕື່ມວ່າ ຖ້າຍັງບໍ່ທັນແຕ່ງງານ ກໍ່ຢາກໃຫ້ຂ້ອຍຍົກໂທດໃຫ້ ແລ້ວຢາກຂໍໂອກາດແກ້ໂຕກັບມາຄືນດີ ຄືກັບຕອນແຕ່ກີ້, ເນື່ອງຈາກເວລານີ້ ແຟນຄົນປັດຈຸບັນຂອງລາວໄດ້ຖິ້ມລາວແລ້ວໄປມີແຟນໃໝ່ ວ່າຊັ້ນ...
ພໍໄດ້ຍິນຄຳເວົ້າແນວນັ້ນ! ຂ້ອຍຕອບແບບບໍ່ລັ່ງເລໃຈວ່າ: ຂໍໂທດເດີ! ຂ້ອຍມີແຟນໃໝ່ແລ້ວ ແລະ ຂ້ອຍກັບໄປເປັນຄືເກົ່າບໍ່ໄດ້ອີກແລ້ວ ສາວເອີຍ!...
ຫວນຄືນອະດີດສະໃໝກ່ອນກີ້ອີກບາດໜຶ່ງ! ໃນເວລານັ້ນຂ້ອຍຮຽນໄອທີປີຊັ້ນສູງປີທີ1 ສົກຮຽນ 2009-2010 ໂດຍສຶກສາຢູ່ສະຖາບັນເຕັກໂນໂລຊີວຽງຈັນ, ພາຫະນະຄູ່ໃຈຍອດຮິດຕອນນັ້ນແມ່ນລົດຈັກຮອນດ້າ 50 ຄັນເກົ່າໆ ທີ່ທຽວໂຮງຮຽນທຸກມື້ຈາກບ້ານດົງປາແຫຼບ ເມືອງຈັນທະບູລີ ມາຫາ ບ້ານໂພນພະເນົາ ເມືອງໄຊເຊດຖາ ນະຄອນຫຼວງວຽງຈັນ, ເຖິງວ່າໄລຍະທາງບໍ່ຮອດ 10 ກິໂລ ແຕ່ກໍ່ຖືວ່າລຳບາກຫຼາຍເພາະລົດມັນເກົ່າໝັງແລ້ວ ເພາະມີຄວາມຈຳເປັນຕ້ອງໄດ້ແປງທຸກໆມື້ ຫຼື ຖ້າມື້ໃດຝົນຕົກກໍ່ຖືວ່າຊວຍເລີຍ! ເພາະຝົນຕົກມາເຮັດໃຫ້ນ້ຳເຂົ້າຫົວທຽນ ຈາກນັ້ນກໍ່ຕິດບໍ່ໄດ້ ກໍ່ຕ້ອງໄດ້ຈູງເມືອທຸກຄັ້ງ.
ໄລຍະນັ້ນ, ຕົນເອງມີຮັກຄັ້ງທຳອິດ ຫຼື ຮັກຄັ້ງແລກ ກັບສາວນັກສຶກສາຕ່າງສະຖາບັນ, ຄວາມຮັກໄລຍະນັ້ນຮູ້ສຶກວ່າງົດງາມພຽງແຕ່ບໍ່ຮອດ 2 ປີ; ສຸດທ້າຍແລ້ວກໍ່ຈົບດ້ວຍການແຍກທາງ ເນື່ອງເຂົາມີທາງເລືອກທີ່ດີກວ່າ (ຄວາມໝາຍກໍ່ຄື ລາວມີຄົນໃໝ່ແລ້ວ). ຕອນສຸດທ້າຍທີ່ເຫັນໜ້າກັນຂ້ອຍຈື່ໄດ້ວ່າ: ເຄີຍພົບກັນຢູ່ຮ້ານອາຫານແຫ່ງໜຶ່ງທີ່ໃກ້ໆກັບເດີ່ນເຕະບານແຖວຫຼັກ 5 ເຊິ່ງຕອນນັ້ນ, ຂ້ອຍ ແລະ ທິມງານເລີກຈາກເຕະບານແລ້ວກໍ່ພາກັນນັ່ງສັງສັນເລັກນ້ອຍ ເນື່ອງຈາກວ່າເຮົາເປັນຄົນຕ່າງແຂວງ ກໍ່ມີຄວາມຈຳເປັນຕ້ອງໄດ້ໄປນຳໝູ່ເພື່ອທຳຄວາມຮູ້ຈັກກັນຫຼາຍຂຶ້ນ.
ໄລຍະນັ້ນ, ກິນເບຍກຳລັງມ່ວນ, ແຕ່ບັງເອີນສ່ຽວນັ່ງກິນເບຍຢູ່ທາງຂ້າງ ຊີ້ບອກໃຫ້ເບິ່ງຜູ້ສາວຄົນໜຶ່ງທີ່ຍ່າງເກາະແຂນກັບຜູ້ຊາຍກຳລັງຢ່າງຂຶ້ນມາໃນຮ້ານບ່ອນທີ່ນັ່ງ. ປາກົດວ່າເປັນແຟນຂອງຕົນເອງ; ຈາກນັ້ນ, ສ່ຽວຄົນນັ້ນກໍ່ຍ່າງເຂົ້າໄປທັກທາຍດົນເຕີບ ແລ້ວສ່ຽວກໍ່ຍ່າງມາບອກວ່າ: ຜູ້ຊາຍທີ່ມານຳກັນກັບແຟນຂ້ອຍນັ້ນ ແມ່ນແຟນໃໝ່ຂອງເຂົາເຈົ້າກຳລັງຄົບກັນຢູ່.
ແຟນຄົນນັ້ນ, ລາວຕັດສິນໃຈຍ່າງມາຫາຂ້ອຍ ແລ້ວຂໍເວລາລົມນຳໜ້ອຍໜຶ່ງວ່າຊັ້ນ, ຈາກການລົມກັນ 2 ຄົນຢູ່ດົນເຕີບ ໄດ້ຂໍ້ສະຫຼຸບວ່າ: “ເຮົາເລີກກັນເທາະ! ເພາະຂ້ອຍມີແຟນໃໝ່ແລ້ວ” ແລະ ອີກຢ່າງ ໜ້າຄືເຈົ້າຄົງບໍ່ຊິລ້ຽງຂ້ອຍບໍ່ໄດ້ດອກ. ອັນທີ່ເຈັບໃຈໄປກວ່ານັ້ນ, ລາວບອກວ່າ: ຂ້ອຍເປັນໄດ້ພຽງແຕ່ທາງຜ່ານຊື່ໆ ເພາະທີ່ຜ່ານມາລາວບໍ່ເຄີຍຮັກ ຂ້ອຍເລີຍ......
ຫົວອົກຂອງລູກຜູ້ຊາຍ 3 ສອກ ຖຶກຜູ້ຍິງບອກເລີກມັນແສນເຈັບປວດຫາຫຍັງປຽບບໍ່ໄດ້ ແລະ ເຮັດຫຍັງບໍ່ຖຶກເໝືອນກັບພະຍຸຖະຫຼົ່ມຢ່າງແຮງ, ຂ້ອຍຕັດສິນໃຈຍ່າງລົງຈາກຮ້ານເບຍພ້ອມກັບນໍ້າຕາທີ່ໄຫຼອາບແກ້ມ ແລະ ມືຈັບກະເປົ໋າຊຸດເຕະບານຍ່າງໄປຕາມທາງ, ຕັ້ງແຕ່ເດີ່ນເຕະບານແຖວຫຼັກ 5 (ຫໍປະຊຸມແຫ່ງຊາດ) ເມືອງໄຊທານີ ມຸ້ງໜ້າສູ່ບ້ານດົງປາແຫຼບ ເມືອງຈັນທະບູລີ ດ້ວຍໄລຍະທາງຫຼາຍກິໂລແມັດ, ສ່ວນລົດຈັກລືມປະໄວ້ຮ້ານເບຍ.
ໃນຕອນຄ່ຳຄືນຂອງມື້ນັ້ນ, ຂ້ອຍຍ່າງຕາມຟຸດບາດຄົນດຽວແຕ່ເດີ່ນເຕະບານແຖວຫຼັກ 5 ຈົນຮອດ 4 ແຍກໄຟແດງທາງເຂົ້າວິທະຍາໄລ ລາວ-ອາເມຣິກາ ພໍດີມີອ້າຍຮັກຄົນໜຶ່ງຂີ່ລົດຜ່ານມາ ລາວໄດ້ຈອດລົດລົງມາຖາມວ່າ: ເປັນຫຍັງຄືມາຢ່າງແຖວນີ້ ມັນເດິກແລ້ວຄືບໍ່ຂີ່ລົດເມືອ? ລົດນ້ອງເດຈອດຢູ່ໃສ? ນ້ອງບໍ່ສະບາຍບໍ? ເປັນຫຍັງຈຶ່ງໃຫ້? ມີຫຍັງໃຫ້ອ້າຍຊ່ວຍບໍ? ແລະ ຄຳຖາມອີກຫຼາຍຢ່າງທີ່ຂ້ອຍບໍ່ສາມາດຕອບໄດ້.... ຈາກນັ້ນລາວກໍ່ພາມາສົ່ງບ່ອນເຮືອນ.
ໃນລະຫວ່າງທີ່ນັ່ງລົດມານຳກັນ ລາວກໍ່ພໍເດົາອອກວ່າຂ້ອຍເປັນຫຍັງ? ລາວບອກວ່າ: “ອົກຫັກເປັນເລື່ອງທຳມະດາ, ແຕ່ເລື່ອງບໍ່ທຳມະດາ ແມ່ນບໍ່ມີເງິນ ກັບບໍ່ມີຄວາມຮູ້. ຈາກນັ້ນ ລາວກໍ່ຊວນໄປເຮັດວຽກນຳ ຫຼັງຈາກທີ່ຂ້ອຍເລີກຮຽນແລ້ວ.
ໃນປີດຽວກັນ ຂ້ອຍຕັດສິນໃຈຮຽນໜັງສືຢ່າງໜັກ ເຊິ່ງນັບແຕ່ 6 ໂມງເຊົ້າ ຫາ 12:00 ໂມງ ແມ່ນຮຽນຢູ່ສູນ ດາຕ້າດິຈິຕອລດີວາຍ ຫຼື (DDD), ເວລາ: 14:00-16:00 ໂມງ ຂ້ອຍຮຽນສ້ອມແປງຄອມພິວເຕີຢູ່ທີ່ຕະຫຼາດຫ້ວຍຫົງ, ເວລາ 17:30 ໂມງ ຫາ 20:30 ໂມງ ແມ່ນຮຽນຢູ່ສະຖາບັນເຕັກໂນໂລຊີວຽງຈັນ ແລະ ຫລັງຈາກນັ້ນ, ເວລາ 22:00 ໂມງ ຫາ 2ໂມງເຊົ້າຂອງມື້ຕໍ່ມາ ຂ້ອຍເຮັດວຽກພິມເອກະສານໃຫ້ອ້າຍຮັກຜູ້ທີ່ນັ່ງລົດມານຳກັນ.
ຂ້ອຍເຮັດວຽກໄປນຳຮຽນໜັງສືໄປນຳ ແລ້ວກໍ່ມີເງິນພໍດາວລົດຈັກມາຂີ່ເດືອນລະ 3 ແສນກີບ. ຈາກນັ້ນ, ຂ້ອຍກໍ່ໂຊກດີໄດ້ເຂົ້າເຮັດວຽກເປັນນັກຂ່າວຢູ່ໜັງສືພິມເສດຖະກິດ-ສັງຄົມ ເຫດຜົນທີ່ເຂົາຮັບຂ້ອຍເຂົ້າເຮັດວຽກນຳ ຍ້ອນວ່າຂ້ອຍພິມເອກກະສານທີ່ເປັນພາສາລາວ ແລະ ພາສາອັງກິດໄວກວ່າຄົນທົ່ວໄປ ສະເລ່ຍ 35-40 ຄຳ/ນາທີ.
ນັກເສດຖະສາດທ່ານໜຶ່ງໃຫ້ຄຳແນະນຳວ່າ: “ຄົນເຮົາເລືອກເກີດບໍ່ໄດ້, ແຕ່ສາມາດທີ່ຈະເລືອກທາງເດີນໄດ້” ຂ້ອຍເພີ່ມທະວີເຮັດວຽກ ແລະ ຮຽນຫຼາຍຂຶ້ນແບບບໍ່ມີມື້ພັກ ເພາະວ່າເຫຼືອໃຈກັບຜູ້ສາວເກົ່າທີ່ເຮັດໃຫ້ເຈັບປວດ. ສຸດທ້າຍຂ້ອຍກໍ່ຮຽນຈົບໄດ້ໃບປະລິນຍາມາຝາກແມ່ ພ້ອມກັບປະສົບການເຮັດວຽກອີກ 4 ປີ, ຕໍ່ມາກໍ່ໄດ້ຍ້າຍມາຢູ່ໜັງສືພິມເສດຖະກິດ-ການຄ້າ ແລະ ໄດ້ເປັນນັກຂ່າວດີເດັ່ນ 3 ປີຊ້ອນ (2013-2015), ປີ 2016 ໄດ້ຮັບຕຳແໜ່ງເປັນຮອງບັນນາທິການ ແລະ ກ່ອນປີໃໝ່ລາວ ປີ 2017 ຂ້ອຍໄດ້ຖຶກຄັກເລືອກໃຫ້ເປັນຫົວໜ້າພະແນກ ຈົນເຖິງປັດຈຸບັນ.
ເມື່ອເປັນແນວນີ້, ຜູ້ສາວເກົ່າທີ່ເຄີຍຖິ້ມເຮົາໃນຕອນນັ້ນກໍ່ຢາກກັບຄືນມາ ເພາະແຟນລາວທີ່ຄົບກັນຢູ່ໃນປັດຈຸບັນກໍ່ຖິ້ມລາວໄປມີຄົນໃໝ່ແລ້ວ. ສຸດທ້າຍ ແຟນເກົ່າຄົນນີ້ມາຂໍເປັນໝູ່ໃນເຟສບຸກ ແລະ ໂທມາຫາ... ຂ້ອຍໄດ້ບອກລາວອີກວ່າ: ສະໃໝແຕ່ກີ້ ຂ້ອຍກິນຕົ້ມໝີ່ ອາໃສຢູ່ຫ້ອງແຖວ ເຈົ້າຄືບໍ່ອີຕົນຂ້ອຍແດ່? ບາດຂ້ອຍມາເຖິງຈຸດນີ້ແລ້ວເຈົ້າຢາກກັບມາ ມັນບໍ່ທັນແລ້ວສາວເອີຍ!!!...
ຜູ້ສາວເກົ່າຄົນນີ້, ກ່າວຄຳຂໍໂທດຫຼາຍໆຄຳທີ່ເຄີຍເວົ້າໃຫ້ຂ້ອຍໃນຕອນນັ້ນ ແລະ ຢາກມີໂອກາດນັ່ງກິນເຂົ້ານຳຈັກຄັ້ງໄດ້ບໍ?!!! ຂ້ອຍຕອບວ່າ: ຂ້ອຍບໍ່ມີເວລາຫຼາຍພໍທີ່ຈະລົມນຳດອກ ເພາະຂ້ອຍໄດ້ເອົາເວລາທີ່ມີຢູ່ໃຫ້ຜູ້ໃໝ່ແລ້ວ!..... ລາວຍັງຂໍອີກວ່າ: ຂໍເວລາຈັກ 5 ນາທີກະໄດ້ ຖ້າຫາກມີໂອກາດໄດ້ພົບກັນ ລາວຈະກ່າວຄຳຂໍໂທດທຸກຄຳເວົ້າທີ່ເຄີຍເວົ້າໃຫ້ຂ້ອຍສະໃໝແຕ່ກີ້ ເພາະຕອນນີ້ລາວຮູ້ສຶກຜິດຫຼາຍທີ່ຫຼອກໃຫ້ຂ້ອຍຮັກ, ແຕ່ເມື່ອຂ້ອຍຮັກແລ້ວກໍ່ຈາກໄປ.....
ທີ່ຈິງແລ້ວ! ຂ້ອຍກະຢາກຂອບໃຈແຟນເກົ່າທີ່ບອກເລີກ ແລະ ເວົ້າໃສ່ຂ້ອຍໃນຕອນນັ້ນ ເພາະວ່າ ຖ້າຂ້ອຍຍັງຮັກກັບລາວຢູ່ຈົນເຖິງດຽວນີ້ ຂ້ອຍຄົງບໍ່ມີປັນຍາລ້ຽງລາວໄດ້ ຫຼື ຖ້າເຂົາຢູ່ນຳເຮົາຂ້ອຍອາດພາລາວກິນເກືອ ຫຼື ເຮັດນາຢູ່ແຖວດົງກະລືມ ກໍ່ເປັນໄດ້.
ກ່ອນວາງໂທລະສັບ ຂ້ອຍບອກລາວວ່າ: ຕອນນີ້ເຖິງວ່າຂ້ອຍຍັງບໍ່ທັນແຕ່ງງານກໍ່ຕາມ, ແຕ່ຂ້ອຍກະບໍ່ໄດ້ເດືອດຮ້ອນຫຍັງ? ຊິໄປທາງໃດກໍ່ສະບາຍ ຫຼື ຈະກັບເດິກກະບໍ່ມີໃຜວ່າ.......ຊ້ຳບໍ່ໜຳ ຍັງມີໂອກາດພົບປະຜູ້ຄົນຈຳນວນຫຼາຍ, ກາຍເປັນທີ່ຮູ້ຈັກໃນວົງການສື່ມວນຊົນ ແລະ ໄດ້ໄປທ່ຽວທົ່ວປະເທດຄົບ 18 ແຂວງໃນໄວອາຍຸ 28 ປີ ນຳອີກ. (ຈົບ)!!!
ແອດມິນ ຫວັງວ່າ ໂພສ ຂອງນັກຂ່າວໜຸ່ມຄົນນີ້ຈະກາຍເປັນແຮງບັນດານໃຈໃຫ້ກັບໃຜທີ່ກຳລັງອົກຫັກ ຫຼື ເຄີຍຖືກຄົນຮັກຖິ້ມໄປ ຄວນເອົາບັນຫານັ້ນມາເປັນແຮງບັນດານໃຈ ແລະ ບຸກບືນຕົນເອງໃຫ້ໄດ້ດີກວ່າເກົ່າ ບໍ່ຄວນຄິດສັ້ນ ຫຼື ເສຍໃຈຊໍ້າຊາກ ເພາະຜູ້ຍິງ ແລະ ຜູ້ຊາຍບໍ່ໄດ້ມີຄົນດຽວໃນໂລກ.
ຂໍ້ມູນ ແລະ ຮູບພາບ ຈາກ ເຟສບຸກ Somsavine Vssp
ความคิดเห็น
แสดงความคิดเห็น